Fegurðin býr í bókum

Bækurnar

Síðumúli 35 Bakhús/108 Rvk.

Crymogea

511 0910

English

Landsýn

Í fótspor Johannesar Larsen

Í þrjú ár, frá 2014 til 2016, var danski myndlistarmaðurinn Johannes Larsen (1867-1961) fararstjóri Einars Fals Ingólfssonar á ferð hans um Ísland. Larsen fór um landið sumrin 1927 og 1930 og dró upp rúmlega 300 teikningar á sögustöðum Íslendingasagna fyrir útgáfu danska forlagsins Gyldendal á Íslendingasögunum. Einar Falur fetaði í fótspor hans og ljósmyndaði umhverfi og fólk á sömu stöðum eða á ferð til sömu staða og Larsen.

Þegar Larsen kom til Íslands var hann á sextugasta aldursári og einn virtasti listamaður Dana. Frá unga aldri hafði hann einbeitt sér að því að túlka danskt landslag og náttúru á blæbrigðaríkan hátt, með sérstakri áherslu á fugla. Íslandsverkefnið reynst talsvert viðameira en Larsen bjóst upphaflega við og teygðist yfir tvö sumur. Fyrra sumarið, 1927, þurfti hann að snúa fyrr heim til Danmerkur en hann hafði ætlað, þar sem sú harmafregn barst honum til Stykkishólms að eiginkona hans lægi fyrir dauðanum – hún lést áður en hann náði til hafnar. Larsen sneri því aftur þremur árum síðar til að ljúka verkinu, beygður maður eftir fráfall eiginkonunnar.

Allt síðan 188 teikninga Larsen birtust í Íslendingasagnaútgáfu Gyldendal hafa lesendur sagnanna dáðst að meistaralegum tökum listamannsins á forminu, hvernig hann dregur upp og lýsir landi og stöðum á hlutlægan, blæbrigðaríkan og fágaðan hátt. Í hnökralausum línum og krossskyggingum birtast fjöll, hagar, vötn og ský, það glittir stundum í bæi og stöku fuglar birtast.

Úrvinnsla Einars Fals Ingólfssonar á myndlistararfi Larsens er af sama meiði og vinna hans með verk breska myndlistarmannsins og rithöfundarins W.G. Collingwood (1854 – 1932) sem kom út í bókinni Sögustaðir árið 2010, gefinni út í samvinnu við Þjóðminjasafn Íslands. Líkt og Larsen dró Collingwood upp myndir af sögustöðum Íslendinga sagna og reyndi á þann hátt að miðla anda staðarins til lesenda sagnanna á Bretlandseyjum. Sögustaðir fengu frábærar viðtökur lesenda og gagnrýnenda og voru tilnefndir til Íslensku bókmenntaverðlaunanna 2010.

Lesa meira