Crymogea

Þjóðfáni Íslands. Notkun, virðing og umgengni er myndræn framsetning á lögum og reglum um meðferð íslenska þjóðfánans. Ýmiss konar ranghugmyndir um meðferð íslenska fánans eru lífseigar í hugum þjóðarinnar, til að mynda að fáninn sé ónýtur ef hann snertir jörð og að þá verði að brenna hann. Einnig eru margir feimnir við að flagga fánanum nema á helstu tyllidögum. Bókinni er ætlað að sýna með skýrum hætti að það er auðvelt að umgangast íslenska fánann af virðingu og að reglur um meðferð hans eru byggðar á almennri skynsemi. 

Formála ritar frú Vigdís Finnbogadóttir.

Bókin tekin saman og hönnuð af Herði Lárussyni. Hann gaf út árið 2008 bókina Fáninn / The Flag um tillögur sem bárust fánanefndinni 1913 að hönnun íslenska fánans og var valinn besti prentgripur ársins 2008 í árlegri samkeppni Félags íslenskra teiknara. 

Í Þjóðfána Íslands eru fánar allra fullvalda ríkja heimsins sýndir með íslenskum ríkjanöfnum eins og Stofnun Árna Magnússonar í íslenskum fræðum hefur skilgreint þau.

Auk þeirrar útgáfu sem fæst í verslunum selur Crymogea 100 tölusett og handinnbunin eintök í leðri sem aðeins fást hjá Crymogeu, Barónsstíg 27.